اصبت بالارتيكاريا 😢
الموضوع بدأ من تقريباً اول نوفمبر اواخر اكتوبر 2023
في يوم روحت فيه من الشغل دخلت استحميت و خرجت اكلت و نمت لقيت نفسي قلقت على الفجر ب احساس قرص او اللي هو عايز اهرش ف رجلي و جمبي بس هرش جامد ف هرشت عادى و قولت دى ناموسة ولا حاجة خصوصا اني كنت نايم بشورت
المهم ده اول يوم تاني يوم صحيت برضه بليل بس الهرش زيادة و كتير و في جمب البطن ف قومت نمت في الصالة و كنت فاكر برضه عشان الناموس
بعدها بيومين ببص على جمبي كده عند احساس الهرش اللي كل شوية يجيي ده لقيت حبة حبوب متجمعين كده و عادى صغيرين قولت برضه قرصة ناموسة و نزلت تحت الهدوم و قعدت تتسلي طول الليل
لحد تالت او رابع يوم لقيت الحبوب دى بتزيد ف احساس الهرش و حسيت انها بتكتر لفوق من جمبي اليمين و الشمال و تاني يوم لقيتها بتكتر اكتر ف كلمت صديقي صيدلي ( نورس) ف اداني مضادات هستيامين و كاميلا دهان و قالي ده طفح جلدي مفاجئ و عادى و خد دول و هيروح
انا قعدت ٣ ايام اخدت الادوية حاسس انه لأ ده بينتشر اكتر في الجناب و بدأ يدخل علي الضهر و بعدها بدأ يدخل على البطن و تحت الباط كده و اليوم اللي بعدها لقيت شوية حبوب على ايدي الشمال وواحدة او اتنين على ايدي اليمين و طبعاً احساس الهرش مكمل معايا كده كده
ف كلمت اختى في اكتوبر حكيتلها الوضع و قولتلها لازم نروح عند دكتور و روحت بالفعل عند دكتور عندها و شاف الوضع و قالي دى عدوى جلدية و حساسية و كتبلي روشتة حقنة و مس و دوا قرص كل ١٢ ساعة و دواء ٣ قرص كل ١٠ ايام
روحت و كله تمام بدأت ف الادوية و قعدت عند اختى ٥ ايام لقيت الموضوع بدأ يقل و يقل جامد و كان فاضله حاجة بسيطة و يختفي ف رجعت الهرم بيتنا تاني و مكمل على الادوية
لقيت الموضوع بدأ يظهر تاني و بيكتر على ايدي و لحد ما في يوم من يومين بعد اسبوع و ٣ ايام من المشي على الروشتة مرة واحدة دخلت انام اول ما حطيت راسي على المخدة تمام اول ما اتقلبت لقيت ضربات قلبي بتزيد و غير منتظمة و مش عارف اخد نفسي و بعدها النبض حسيت انه بيطلع على راسي كان حد بيطلع سلم كده ثنة نثة دايرة دايرة لحد ما وصل ل دائرة العين و الودن و فضل شوية كده و كل ده و انا مش عارف اخد نفسي غير بصعوبة و مش من مناخيري مناخيري مش شغالة دلوقتي و مش شامم حاجة ففتحت النور و ببص على كاميرا الموبايل لقيت وشي و رقبتي منفوخين و بينبضوا و مش عارف اخد نفسي و ضربات قلبي مش منتظمة و ضيقة ف صدري و مش عارف اتنفس ولا اتكلم و مش فاهم فيه اي الحالة دى فضلت نص ساعة و هديت معرفتش انام طبعاً الليلة دى خوفاً من انها تجيلي تاني و انا نايم
و بعد الموضوع ده علطول ببص على جسمي لقيت كل الحبوب اللي عندى اتضاعفت و ملت جسمي كله البطن و الضهر و سخونية ف جسمي و اليوم التاني بقي بعديها جه ف نفس الوقت نفس الاحساس بس ضيق في الصدر و ضربات قلب غير منتظمة و سخونية بس كنت عارف اتنفس و ببص على جسمي لقيت الحبوب دى شكلها يخوف كبيرة و ف كل حتة و حمرا
ف قولت لازم اروح لدكتور تاني عشان الدوا اللي اخته اولاني ده غلط و بنسبة كبير التشخيص كان غلط ف عمل نتيجة عكسية و زود الموضوع و انا امانة بدأت اقلق ان الموضوع خطير خصوصاً بعد تورم الوجه و ضيق التنفس ف قولت هروح لدكتور تاني و مش هستني الاستشارة اللي هيا كمان ٣ ايام كمان بس مضمنش ممكن يحصل فيهم اي بصراحة
روحت عند دكتور تاني اسمه د.احمد ابو طالب وريته كل الكلام اللي فوق ده و الصور و قالي ان عندى ارتيكاريا زي ما كنت شاكك بناءاً على البحث اللي عملته مع نفسي عن الموضوع و ان الدكتور الاولاني شخصني غلط و شخصني علي انه جرب ف ادوية الجرب دى لما انا اخدتها عملت مضاعفات للارتيكاريا و زودتها و عملت ورم الوش و ضيق التنفس و الكلام ده و اداني حقن و دوا و مرهم امشي عليهم و استشارة بعد ١٠ ايام
و دلوقتي وبعد اول يومين من الالتزام بالدوا الجديد جسمي اتحسن و الحبوب مظهرتش و ضيق التنفس مجاش الحمدلله في بس الحبوب الحمرا دى ظاهر مكانها بقع حمرا و الدكتور قالي دى هتفضل موجودة معاك لحد ما نخلص الكورس ده الاهم اننا نخلص من الهياج المفاجئ و من الهرش و البقع الحمرا دى هنشتغل عليها لوحدها ف هكمل على الدوا و نشوف ماذا سيحدث و الحمدلله على ما وصلنا اليه
الحمدلله اختفت اثار الارتيكاريا نهائياً قبل موعد الاستشارة ب ٦ ايام و هذه الصور للتوثيق
و قبل الاستشارة ب ٤ أيام تحديداً بعد ما خلصت الحقن جالي ضيق التنفس تاني و بعض الحبوب ف دراعي و ايدي
روحت الاستشارة و الدكتور قالي ان انا الحمدلله خفيت و ان الحالة اللي بقول عليها دى حلاوة روح الارتيكاريا و هتروح مع الوقت و قالي اكمل على الدواء اللي بخده لحد ما يخلص و لكن ...
بعد يومين من الاستشارة ظهرت حبوب على صدرى و في وشي و ف ضهرى
رجعت لدكتور الجلدية مرة تانية في كشف جديد بعد اسبوع من الاستشارة وقولتله ( كنت عند حضرتك يوم السبت اللي فات و يوم الاتنين لقيت حبوب ظهرت على صدري و وشى و يوم التلات اكتشفت انه في حبوب ظهرت في ضهرى كمان ، استخدمت المرهم اللي حضرتك قولتلي عليه لكن مش بيعمل حاجة و كملت في البرشام اللي باخده لكن قولت لازم اجي لحضرتك عشان كده غالباً الارتيكاريا لم تنتهي بعد ، و حالة ضيق التنفس و ضربات القلب بتجيلي يومياً ما بين الساعة ٩ و ١١ صباحاً بتيجي نص ساعة و بتروح و ده ان دل قد يدل على ان الارتيكاريا لسه عندى و انا اتعالجت فقط من الطفح الجلدى اللي سببتهولي و الله اعلم ) ، ف كشف عليا و قالي ان ده تنزل تحت تصنيف حب الشباب و عشان بشرتي دهنية و ملوش علاقة بالارتيكاريا و لكن ممكن يكون جالك من الادوية و الحقن اللي اخدتها عشان جسمك مش متعود ف موضوع طبيعي يعني و كتبلي على غسول و دهان و مس و برشام و الاستشارة بعد أسبوعين.
و كل يوم ضيق التنفس لسه معايا قبل ميعاد الاستشارة ب أسبوع كنت ف مدينة السلام عند ابويا و اخواتي و حالة ضيق التنفس و ضربات القلب لسه بتجيلي لحد ما النهاردة جاتلي الحالة دى شديدة المرة دى و انا بذاكر لاخويا الصغير و مقدرش اكمل معاه مذاكرة و فردت جسمي علي الارض مكنتش قادر من ضيقة التنفس و بعدين قومت علي السرير و خليت اختي تذاكرله و انا نايم علي السرير مش قادر اخد نفسي و بكح ووجع ف قلبي زي نغزة كده و صدري محشرج و صوتى رايح فضلت شوية كده لحد ما اختي ما لاحظت و ندهت على مامتها جت و قالتلي لازم نشوف دكتور عشان ممكن تدخلك ف غيبوبة او يغمي عليك ف روحنا لدكتور جمبه و حكيتله الحالة من الأول خالص و قالي اني اللي ف وشى و جسمي ده حب شباب و جه مصادفة بعد الارتيكاريا يعني ملهمش علاقة ببعض و بالنسبة لضيق التنفس اداني دواء و قالي بعد ١٠ ايام لو استمر الموضوع روح دكتور صدر و اداني ادوية و مرهم و مس و غسول لمدة ٢٠ يوم و بعدها استشارة ان شاء الله.
الحمدلله علي كل حال 💓
جالي تاني بعد يومين من الدكتور الجديد حالة ضيق التنفس و الاعراض اللي حسيت بيها اخر مرة : ضيق تنفس ضربات قلب غير منتظمة و أحيانا نغزة و حرارة في الجسم احمرار الوجه و تورمه أحيانا و مناخيري بتتسد و بتنفس من بوقي و بصعوبة و احساس ان حد خانقني اختلال في التوازن اثناء المشي احيانا و موخراً بتجيلي رعشة في اليد اثناء ضيق التنفس
روحت لدكتور صدر زي ما نصحني دكتور الجلدية و قولتله (جالي ارتيكاريا و روحت لدكتور جلدية و اثار الطفح الجلدى راح الحمدلله و بعد ما وقفت الادوية بدأت تجيلي يومياً بعد ما اصحي و تحديدا بعد ما افطر و قبل ما انام حالة كده بتقعد من ربع ساعة ل ساعة لما بتبقي شديدة ضيق تنفس و ضربات قلب غير منتظمة و أحيانا نغزة و وشي بيحمر و بحس ف رقبتي كأن حاجة خانقني انا شاكك في الغدة الدرقية حصل فيها حاجة بس دكتور الجلدية قالي روح لدكتور صدر و ان الارتيكاريا ممكن تكون اصابت حاجة الطفح الجلدي راح بس الحالة دي مستمرة معايا ، الاعراض اللي بحس بيها بالترتيب : حرارة داخلية في الجسم الوجه و الصدر ثم احساس ضيق تنفس ثم ضربات قلب غير منتظمة و أحيانا نغزة في القلب ثم احمرار الوجه و أحيانا تورمه مع الرقبة و مش بقدر اتنفس غير من بوقي و ساعات مناخيرى بتتسد و احساس ان حد خانقني كده و لما بحاول امشي بحس باختلال في التوازن وببقي مش عارف اتكلم او عارف بس صوتى تخين و بتكلم بصعوبة ) ف كشف عليا و قالي احنا محتاجين نعمل اشعة على الصدر و تيجي روحت عملتها و جيت شافها و قالي ان الصدر تمام مفيهوش مشكلة ف هنعمل تحاليل على الغدد و قالي ان احتمال يكون ليها علاقة بالارتيكاريا
و نتيجة تحليل الغدد بعتها للدكتور زي ما قالي و قالي ان الهرمون المحفز للغدة الدرقية ناقص شوية انما الهرمونات نفسها مظبوطة و ، يفضل نعرضها علي دكتور باطنة او غدد
روحت لدكتور الباطنة و الغدد و كشف عليا و قالي انه الاعراض دي نفس اعراض تشخيص فرط نشاط الغُدَّة الدرقية أو التسمم الدرقي اعراضه بالظبط اللي بتجيلي ، و قالي محتاجين نعمل اشعة تلفزيونية اللي هيا سونار للغدة و اوريهاله و قالي علي تحاليل بس قالي متعملهاش غير لما توريني الاشعة و انا اقولك ، بعتله الاشعة و قالي هنكمل العلاجات زي ماكتبها و الاشعه التليفزيونيه كويسه مفيش اي نتوءات او اكياس اشوف حضرتك في الاستشاره بعد اسبوعين ان شاء الله و مقاليش اعمل التحاليل
ثم ظهرت الارتيكاريا من جديد او انا مكنتش واخد بالي انها بتظهرلي كل يوم لما بتجيلي حالة ضيق التنفس دي و بعت للدكتور الباطنة و دكتور الصدر و الاتنين اجمعوا ان في الغالب الجهاز المناعي أتأثر و حصل فيه اضطراب و بيهاجم حاجة عادية زي الشاي بلبن عشان ده بيحصلي كل يوم بعد الشاي بلبن ولكن مش هبطل شاي بلبن انا اسف ده العشق 😂😂
المهم الدكتور قالي محتاج تشوف دكتور امراض الدم و الجهاز المناعي عشان تعالج الاضطراب ده بس بعد ما تخلص الادوية اللي اديتهالك عشان الادوية اللي اديتهالك فيها بالفعل مضادات للحساسية و ممكن تعالج الموضوع من ناحيتها
و بعدين روحت لدكتور حساسية و مناعة في مدينة نصر ، و قالي اني معنديش حساسية لبن ولا حاجةبس عندي حاجة اسمها ارتيكاريا فيزيائية و هيا بواقي اثار الارتيكاريا اللي كانت عندي و اداني دواء و تحاليل اعملها قبل ما اروحله، و فهمني ان الارتيكاريا الفيزيائية دي بتبقي موجودة ف الجسم و مدام مفيش حاجة نكشتها ف هيا بتبقي هادية لكن لما بتنكشها بالالبان او المواد الحافظة او كده بتعملك الاعراض اللي بتحس بيها دي .
و بعد اسبوع من اخد الادوية الحمدلله مجاليش الاعراض اللي كانت بتجيلي دي او الحالة الحمدلله 💓
عملت التحاليل المطلوبة و طلع ان فيه نقص في كرات الدم البيضاء و الدكتور اداني فيتامين ب ١٢ و دوا تاني و قالي هنمشي علي الادوية القديمة تانية لمدة شهر و اروحله
بس علي هامش الموضوع صباعى السبابة مدوحس و مؤلم و بدهلنه مرهم اسمه المرهم الاسود ، معرفش السبب بس ناس كتير قالتلى عشان شيلت الودنة او خبطه ف اتشالت
بعد فترة كان المفروض اروح لدكتور المناعة اللي ف مدينة نصر بس انشغلت ف مروحتش و جه العيد الكبير ف شهر ٦ و خرجت انا و اخواتي ف مول و ملاهي العاب و دخلنا لعبة فيها تنطينط و فرهدة و انا في نص اللعبة حسيت اني تعبان مرهق كده ووشي منمل ف كملت لعب عادي بس لما هديت الموضوع بدأ يزيد و طفح جلدي ف جسمي و ف وشي كمان ف قعدت لحد ما هديت الحمدلله مكنش فيه ضربات قلب غير منتظمة ولا ضيق تنفس و لا الاعراض القديمة كلها هو بس كان الطفح الجلدى و تنميل ف وشي و اطرافي ايدي و رجلي بس
ف قولت اروح لدكتور تاني بعدها عشان اطمن و اشوف اي ده ، ف روحت لدكتور معروف اسمه أمجد الحداد في التجمع الخامس و هو رئيس هيئة المصل و اللقاح و لقيته بيتكلم ف فيديوهات عن موضوع الارتيكاريا ف روحتله و حكيتله الحدوتة كلها و قالي محتاجين نعمل اختبار حساسية و اداني دواء امشي عليه اسبوعين و ارجعله و لما روحتله اخدت نتيجة التحاليل و كانت معنديش حساسية من حاجة الحمدلله و لما دخلتله ف الاستشارة قالي اننا كويسين بس هناخد مصل لمدة سنة يمنع ظهور الاعراض دي مرة تانية جرعته عباة عن حقنة تحت الجلد مرة ف الاسبوع و اروح للدكتور كل ٣ شهور عشان المتابعة .
و من ساعتها و انا ماشي علي الحقن و الحمدلله مفيش حاجه
الحقن خلصت بعد سنة و كده تمام المفروض اعمل تحاليل عشان اطمن بس معملتش، بس اللي ملاحظه اني بقيت احسن و بقيت بمارس حياتي بشكل طبيعي بس فيه حاجة صغيرة ملاحظها هيا ان الحالة اللي بتجيلي دي بتيجي لما اعمل مجهود جامد او اشيل حاجة تقيلة اوي دولاب مثلا او شنطة سفر كبيرة و اطلع بيها سلم عالي مثلا او اعمل اي مجهود جامد بس
و الحمدلله علي كل حال 💓
كانت قصة طويلة و مرهقة و مخيفة بس الحمد لله ربنا ليه حكمته في اللي حصل و كمان عشان اعرف ان حياتك ممكن تنتهي في اي لحظة ف انت قوي دلوقتي او انت معاك فلوس دلوقتي بس ممكن ف لحظة كل حاجة تروح منك.
النهاردة ٢١ اكتوبر قررت اروح للدكتور تاني عشان اطمن خصوصاً بعد موضوع البانيك اتاك ده و اني لما اعمل مجهود اتعب ف روحت للدكتور كشف عليا و قولتله الحالة فيها اي و افتكرني ووريته التحاليل ف قالي احنا بقينا احسن كتير الطفح الجلدي مبقاش يجيي و التعب اللي كان كل يوم ده و التعب اللي كان بسبب منتجات الألبان و فاضل بس فكرة المجهود و ده هنعالجه بكورس حقن تاني و محتاجين نلعب رياضة عشان نعود جسمنا ان فيه مجهود عشان انا شغلي مكتبي و اداني فيتامينات لمدة شهرين و الحمد لله ✨💓
Comments
Post a Comment