جواك..من غير فلتر

قصة البراند بتاعي و كل التفاصيل الممكنة اللي حصلت و هحاول يبقي بالتواريخ

تمهيد:

    بص بقى يا سيدي احكي لك الحدوته من الاول خالص   انا فارس كرم وانا صغير كان عندي حلم اني افتح البيزنس الخاص بتاعي وما كانش عندي اي فكره    اني لما اكبر هبقى موظف وتقريبا كل حاجه مشيت عشان تحقق الهدف ده دخلت  كليه حقوق  رغم انها كانت مش الكليه اللي انا عايزها بس دخلتها عشان التنسيق جابها وما كنتش عارف اعمل ايه لما اتخرج في الوقت ده بس كان عندي هدف واحد ان انا مش هشتغل موظف وطبعا بالتالي مش هشتغل محامي واتعلمت   مهارات كتير في الكليه طبعا لما دخلت الجواله وحاجات مختلفه كثير منها تطوير الذات القياده ازاي نعمل دراسه الجدول مشروع ازاي نعمل تسويق تقريبا حسيت نفسي جوه مشروع بس في الكليه وفرصه ان انا اتعلم كل حاجه عن الخبرات اللي بدور عليها في المكان ده بعدها جات لي اول فرصه ان انا افتح مشروع بس ما كنتش انا صاحب الفكره كنت انا مساهم في الموضوع يعني في حد كلمني صديقي قال لي ان هو يقدر يورد قمصان مش عارف ينفع اقول اسمه ولا لا  بس المهم كنت انا في الفتره دي شاطر في الميديا وفي اداره صفحات الفيسبوك والكلام ده الكلام ده في ثانيه كليه في ثالثه كليه قلت له   خلاص انا معاك وكان طالب مني طلب بسيط ان انا اعمل له التصميمات وان انا اتابع الردود والرسائل والكلام ده هو هدفه ان يوصل للشركات اللي بتورد قمصان بالكميات او اللي بتطلب قمصان بالكميات وبالفعل بدانا ما كنتش اعرف ازاي اعمل اعلان ممول فاستعنت حد ما نعرفوش يعني انا ما اعرفوش عمل لنا الاعلان   بس للاسف ما كانش في اوردرات وعملنا الاعلان الثاني والثالث وبرده نفس الكلام في رسائل كثير جدا بس ما فيش عميل حقيقي نوصله ومن هنا طبعا حصل احباط وتدريجيا الموضوع اتقفل و ده كان اول مشروع  ليا  بعد كده عدت فتره من الوقت وانا تقريبا في ثالثه كليه او رابعه كليه   في واحد ثاني كلمني وقال لي احنا هنفتح لوكال براند وهنعمل  هوديز  تيشرت وتيشرتات اوفر سايز والحاجات اللي طالعه موضه الفتره دي بدانا بالفعل عملنا الصفحه وعملنا الستور وعملنا البراند بالكامل واتفقنا مع شركه شحن وعملنا عينه مع المصانع وكل حاجه كانت زي الفل  وانا كان دوري الحاجات ديجيتال كلها يعني الستور   الصفحه وهكذا وبعد كده عملنا اول اعلان وبدانا وجالنا اول اوردر بس كان طلبيه كبيره مدرسه عملناه ونفذناه والموضوع كان اننا اصلا بنبيع بالقطعه فلما جت طلبيه جديد كبيره حسينا انه ايه ده طب محلو الطريق ده نستهدف الشركات  وعملنا بعدها كذا اعلان هدفنا فيهم اننا نبيع يونيفورم  للشركات والمدارس والمطاعم واخذنا الخط ده كله على بعضه بس للاسف حاسس ان ده كان السبب اللي خلانا نوقف  برده انا في المشروع ده ما كنتش مؤسس كنت شريك مساهم  يعني ماسك حته معينه وبس فبرده  الموضوع قعد يقل الكلام عنه تدريجيا لحد ما اتقفل تماما  بعدها كنت اتخرجت وبدات اشتغل في المجال اللي هو الديجيتال والديزاين وكل الحاجات الجميله دي  اللي هي بعيده كل البعد عن المحاماه وكنا بالفعل شغالين  على مشروع يعتبر فكرتي هو تسويق الهاند ميد بحكم ان انا احتجيت بمجال الهاند ميد وفنانين الهاند ميد في الجواله وكنت حابب ان شغلهم ده يبدا يطلع لناس تشتريه ويطلع  للنور  بس ما كنتش اقدر اموله عشان كده قلت الفكره للشركه اللي انا كنت شغال فيها وتبنوا الموضوع وبقيت شريك فيه  نسيت اقول حاجه مهمه ان انا وانا في الكليه فتحت مشروعين  هدفهم الهاند ميد كان الاول فيهم اتعلمت  في حاجات كثير جدا عن اداره المشروعات والمشروع الثاني كان نفس الهدف بس بشكل جديد واتعلمت فيه برده حاجات اكتر  وتجنبت اخطاء المشروع الاولاني  عشان كده بقول ان مشروع الهاند ميد اللي شغال دلوقتي وهو ابتكر يعتبر بدا من عندي  اه مش انا المؤسس بس انا الملهم للمؤسس وانا شريك فيه فممكن حد يقول انا كده حققت حلمي بس برده ما كانش ده اللي انا كنت عايزه كنت عايز حاجه انا المؤسس بتاعها بالكامل   وكان في تجربه تانيه مع واحد  عملنا تصميم منديل سوا وكنا عاملينه لينا اول ما عملناه ان هي ناس كتير بتسال ده بتاع مين ونجيبه منين والكلام زي ده فقلنا ليه ما نعملش ثاني ونبيعه فبدانا ناخذ الطلبات وناخد الفلوس وبدانا ننفذ بعد ما خلصناه الموضوع كبر وبدانا نتكلم في مشروع بجد برده لوكال براند  بس كان واخد طريق مختلف تماما هنا احنا المؤسسين وانا المسؤول عن قسم الديجيتال بالكامل والشريك اللي معايا مسؤول عن المصانع والكلام ده كله فهو بالفعل بدا ينزل مصانع وبدا يسال على اسعار القماش وبدا ياخد الطريق الصعب ان احنا ننفذ كل حاجه وكان بيتكلم في فكره بقى ان احنا نعمل ستوك   ونخزنه عندنا ونبدا نعمل اعلانات وكده بس الموضوع كان محتاج فلوس كثير ومش مضمون الفلوس دي هترجع ولا لا فقلت له ان انا مش معايا او انا محتاج افكر في الموضوع وبعد كده بدانا عملنا الصفحه وعملنا الحاجات دي كلها بس عملنا اللوجو يعني والكلام ده كله بس ما كملناش بقى مع بعض بسبب الاختلاف انا كان عندي اتجاه ان انا مش عايز اخد ريسك بفكره المصنع و حاسس ان فيه طريق تاني  و هو عايز ياخد الطريق الصعب ده, لحد ما وصلت وانا شغال في الشغل لمرحله ان انا حسيت فيها ان انا جاهز اعمل حاجه بتاعتي اتعلمت حاجات كثير ووصلت المصنع وعرفت ازاي ابني ويب سايت وعرفت ازاي اعمل منتجات تبيع سوشيال ميديا قويه ازاي ابني هويه براند كل الكلام ده ما كنتش هعرفهم من غير الشغل في اللحظه اللي قلت فيها انا جاهز كلمت زميل ليا في الشغل  وكنت دايما في الشغل بلعب معاها هات وخد  حسيت ان هم ده المناسب انه يبقى شريك معاه فقلت له على فكره عجبته   قال لي يلا نجرب ومن اول هنا بدا جواك في اللي جاي

ابتدي احكي ازاي الاسم جه ازاي بدأت كل حاجة و ازاي انا كنت عايز اعمل براند بيبع حاجات مطبوعة و اي حاجة مطبوعة بجد الفكرة مكنش شايف ليها آخر حتي لو المصنع مش هيوفرلب المنتج هخلص المنتجات اللي عنده الاول و بعدين اشوف مصنع غيره يوفرلي المنتج التاني و هكذا و كمان كنت عايز اعمل براند عالمي بجد يبقي معروف و مسمع و سبب رزق ناس كتير مصممين بقا او عمال او فروع محلات و ناس تبقي فيه ايا كان

---------------------------------------------------------------

اول حاجة عملناها مايند ماب و رود ماب او خريطة واضحة للطريق بتاعنا و الفكرة ممكن توصل لفين

  الخريطه بتاعتنا كانت واضحه اول حاجه هنشوف احنا محتاجين نوصل لغايه فين الهدف بتاعنا والرؤيه ثاني حاجه بدانا نبص على المنافسين حوالينا اللي في نفس المجال بتاعنا احنا اول حاجه حددنا هنشتغل طباعه حسب الطلب وده بسبب اننا لقينا كل المقومات اللي احنا محتاجين ليها المصنع موجود عرفناه من شارك تانك   اسمه زنك وهو بيتكلم حسيت ان هو بيدور عليا وانا كنت بدور عليه ومن الناحيه الثانيه دورنا على موقع يكون سهل في ان احنا نبنيه وما يكونش مكلف كتسويق والكلام ده احنا عايزين استور شوبي فاي لقيناه غالي جدا علينا  اه كان بيديني اوفر جنيه في الشهر بس بعد ثلاث شهور هياخد مني رقم كبير جدا وما كنتش عارف هقدر عليه ولا لا لحد ما وصلت لايزي اوردر و هو بيحاسبني انه بياخد نص جنيه من كل اوردر بس و احنا بشحنله رصيد ياخد منه كل فترة ف حسيت ان هي فيها بالظبط اللي انا بدور عليها   فيها كل حاجه انا محتاجها وبس كده فاضل لنا اننا ندرس المنافسين واننا نختار اسم للبراند  ونبتدي نبني اللوجو والشعار والهويه البصريه   بدانا نقترح اسامي كثير جدا بس كان عندنا هدف واحد لان احنا عايزين اسم يلمس الناس عايزين اسم يكون كرياتيف مصري الناس لما تشوفه وتبتسم تضحك بندور على اسم ما تعملش قبل كده كان في اقتراحات كثير   طبعا بعد ما شفنا اسامي المنافسين كان في اسامي كتير زي بلد الفن   وايوه ومش مظبوط ويا زميلي وهلا والله والمود وكان في اسامي انجليزي وكان في خط وكان في طباعه مصر وكان في مزيكا وكان في زينه وكان في ثمانجا ومش معقول وجامد قوي وبس كده وطول بالك وكان في   طول بالك    كل الاسامي دي ما كانتش عجباني فقعدت ارغي شويه انا وشريكي وشات جي بي تي  وكلمه اكتر عن البراند وانا انا عايز اعمل ايه انا عايز اعمل حاجه تعبر عن الناس اللي لابسها تعبر عنه وبدات ارغي معاه في الستايل البراند وانا عايز اوصله لفين وعايز الشكل بتاعه يبقى عامل ازاي والخطه الشامله تقريبا بالشكل اللي انا متخيله في دماغي  فالمهم    قلت له بناء بقى على الكلام اللي احنا اتكلمناه ده كله اقترح لي اسامي براند بدا يقترح اسامي مختلفه زي دماغي كلام فاضي مشمش ولا حاجه كده كده عشوائي وجواك ومش مظبوط وطمطم فحسيت ان اسمه جواك وكان عاجبني فيه حته ان الاسم او الكلمه دي ممكن تتقال في اي جمله عادي جدا انت جواك ايه انت انت حزين من جواك وكمان كنت عايز البراند يبقى بيطلع اللي جواك من غير ما تجمله عشان كده اخترت الشعار يكون من غير فلتر عشان تبقى على بعضها جواك من غير فلتر وبعديها اشتغلت على اللوجو كنا في عيد الفطر لسنه 2025  خليت شات جي بي تي يديني بريف عشان يسهل عليا المهمه وبدات انا اعمل بحث عن الاشكال اللي انا متخيله في دماغي انا في تصميم في دماغي بس مش عارف اطلعه    وبدات اشتغل وطلعت كذا فكره لحد ما استقريت على الشكل ده وهوريكم كذا فكره برده

و ف نفس الفترة دي كان فيه اعلان للبنك الأهلي المصري اغنية لمحمد حماقي وويجز اسمها جواك عالم " ف حسيت انها اشارة و ان ده الاسم الصح و انه بينادي عليا "

--------------------------------------------------------------------------------------------------------------------

 المنتجات 

 والاقسام والمنتجات اللي هنبدا بيها ما اضحكش عليك الموضوع ده كان صعب جدا لان انا مش عارف ايه المنتج اللي هيبيع معايا وفي نفس الوقت ما عنديش صور الكلام ده   كان الذكاء الاصطناعي لسه في اوله فما كناش بنعرف نعمل بيه حاجات حلوه قوي زي ما هي في دماغي وكان يهمني تفاصيل المنتج ان هي تطلع مظبوطه الصوره زي الواقع بالظبط  ما كناش   هنعرف نعمله في الوقت ده فقررنا

 اننا هناخد الطريق الصعب واننا هنبني نموذج او قالب لكل منتج نقدر نعمله بحيث ان احنا نحط تصميم المنتج اللي هنعمله جوه القالب فالمنتج يطلع بالظبط زي الصوره  طبعا ده كان مرهق جدا وخد وقت طويل تقريبا يومين شغل من غير نوم وكان في منتجات بجد صعب جدا نلاقي القالب بتاعتها دي على النت زي مثلا البطاطين زي المخدات زي الحاجات اللي هي تصميمها معقد بس الحمد لله ربنا قدرنا وجبناهم كلهم وقدرنا نعمل مكتبه قوالب لكل المنتجات اللي عندك او بكل الاقسام بس هنا كان في تحدي ثاني ان انا محتاجين نبني كل قسم منتجات عشان الويب سايت ما يبقاش فاضي وهنا كان قدامنا طريقين يا اما نمله وخلاص ونلم من على النت اي حاجه موجوده يا اما بجد نختار المنتجات الحلوه واللي احنا شايفين ان هي بجد بتعبر عن اللي جواك  وده كان الهدف الاساسي فاحنا اخترنا ان احنا هنروح في اتجاه الباترن  اللي هو المنتج ده ينفع يركب تقريبا على كل الاقسام بتاعتها وبالفعل بدانا نعمل كده وبدانا نجمع مجموعه باترن  تكون مناسبه ومعبره عن الهويه وتكون كريتيف زي مثلا اول منتج لينا اسمه اشباح كيوت احنا اخترنا ثلاث اشكال وحطيناهم في كل الاقسام وكده بالنسبه لنا احنا جاهزين اننا نعمل اول اعلان بس كان في شويه اقسام مش هينفع يتحط فيها المنتجات اللي من النوع ده زي مثلا تيشرتات فالمنتجات دي او الاقسام دي قررنا ان احنا ناجلها شويه لحد ما نقدر نقف على رجلينا ونبتدي بعديها نكبر قسم قسم واللي مفتوح مزوده واللي مش موجود حاليا بس موجود في الخطه يبتدي يبقى ليه وجود بس بعد ما نخلص كل المفتوح قدام الناس يعني كل اللي مفتوح  يكون مليان منتجات بجد حلوه وبعديها نبتدي نطلع المنتجات اللي مش موجوده على الويب سايت والمنتجات اللي ممكن تحتاج مجهود مننا احنا كافراد اكثر لان احنا لغايه دلوقتي الفكره كلها ان احنا هنعمل التصميمات نحطها على المنتجات ونخلي المصنع ينفذ ونعمل اعلانات وشكرا قدام شويه احنا اللي هنصنع بايدينا واحنا اللي هنبتدي نعمل منتجات بجد بتاعتنا

----------------------------------------------------------------------------------------------------------------------------

الاعلانات و الصفحات 

 بدانا نعمل اول اعلان نجهزه و ف نفس الوقت كنا بنقدم علي اضافة بوابات الدفع عندنا علي الويبسايت و بعتنا لشركة دفع و مضبنا العقد و مستنين الرد و التجربة ف قولنا يلا نجهز الاعلانات بس هنا كان في تحدي ثاني خالص اننا مش عارفين ازاي نعمل تسويق او اعلانات اوكي انا كشغلي بعرف اعمل تصميم حلو بعرف اعمل منتجات حلوه بس كنت دايما بديها لحد يسوق لها ما كنتش انا اللي بسوق  والموضوع ده كنت خايف ان هو حوار كبير جدا جدا جدا ومن هنا قررنا اننا هنذاكر اعلانات مموله وازاي تتعمل وكل الموضوع ده على كبير جمعنا ثلاث كورسات كورس بيدي مقدمه على الموضوع بشكل عام وكورس بيدي تفاصيل اكثر وكورس ثالث للمحترفين    عملنا ايقاف مؤقت للمشروع  لحد ما نخلص المذاكره واحنا كان عندنا فكره اننا مش عايزين نعمل صفحه سوشيال ميديا عشان الاسم ما يتسرقش  او ما يتلمحش او تبان ان الصفحه دي مش شغاله في حين ان احنا كنا بنذاكر لسه وما كناش لسه نزلنا اي حاجه كنا لسه بنجهز فكنت عايز اول ما نكون جاهزين  نعمل الصفحه وننزل البوستات ونعمل اعلانات ويلا يلا يلا يلا   وقد كان  مسكنا اول كورس خلصناه وكنا بنتحدى بعض كل يوم ونسال بعض في الكورس ده الكورس على اليوتيوب  فما كانش في حد بيتابع معانا بس احنا كنا بنمتحن بعض نتاكد ان احنا فاهمين لحد ما خلصنا اول ما خلصنا عملنا خطه تسويق وبدانا ننفذها اللي هي كانت عباره عن بوستات تعريفيه وبعد كده بوستات لاقسام المنتجات المتاحه حاليا وبعدها نبتدي نعمل اعلانات بحيث ان ده هيخلي اللي يدخل على الصفحه يلاقي في شغل بالفعل عملنا الصفحات فيسبوك وتيك توك وانستقرام وانا اخذت رقم من ارقام تليفوني كان في رقم كنت لسه جايبه جديد وعملته رقم الشركه وتساب وبدانا عملنا اول اعلان كان اعلان تعريفي   ما كناش مستنيين منه اوردرات بس كنت مستني منه متابعين وتفاعل وكده وقد كان الناس لمست الفكره الناس تفعلت معاها  في يومين بس بقوا 1200  متابع  فحسيت ان المؤشر حلو والفيديو كان عليه لايكات والبيدج والبوست كان عليه لايكات وفي تفاعل بعدها قلنا يلا بينا عملنا اول اعلان مبيعات طبعا انا كنت قايل لكم ان احنا مش عارفين انهي منتج هينجح او انهي قسم هيبيع فحطينا كل الاقسام في اعلان واحد انا هحط لكم الصور بتاعه الاعلان التعريفي والصور بتاعه الاعلان الاولاني بتاع المبيعات يعني كان اعلان غريب كان في في الوقت ده ترند واحنا عملنا زيه بس كان فكره سيئه بالرغم من ذلك الاعلان ده جاب لنا مبيعات جاب لنا اربع اوردرات بس كلهم ما كانوش من    الويب سايت كانوا حاجات مخصصه عميل محتاجها واحنا نفذها له  اول مره طلب اثنين وبعد ما استلم عجبته وطلب اثنين كمان 

  المهم في الاعلان ده كله القسمه الوحيد اللي اشتغل كويس هو قسم الماوس باد لانه جايب منه اربعه اوردرات ساعتها قلنا يبقى ده اول قسم محتاجين نركز عليه  وفي نفس الوقت ده كنا مقدمين على ربط بوابه الدفع عندنا الدفع بالفيزا والكلام ده على الويب سايت وبالفعل جت وجربنا ندفع الفلوس وعملنا تيست    ومن الناحيه الثانيه بدانا نغذي قسم الماوس باد اكثر واكثر وعملنا له اعلان لوحده والاعلان ده ما كناش متوقعين نتايجه  ده لاننا كنا محبطين من الاعلان اللي قبليه لان احنا صرفنا مبلغ كبير وجاب لنا اربع اوردرات بس    بس تفاجئنا  اول يومين ان الاعلان الجديد خلص راس المال اللي احنا حاطينه بسبب الاوردرات نسيت اقول لكم حاجه زنك بتعمل حاجه بتاخذ فلوس تنفيذ الاوردر مقدمه بمعنى انا بعمل اوردر ب 100 جنيه زنك بتنفذه ب 80 زنك بتاخد ال 80 قبل ما تمد ايديها باي حاجه وانا بقول لها   خدي من العميل 100   فالمصنع بعد ما يحصل من العميل يرجع لي 100 كده انا كسبت 20 طيب العميل ما استلمش انا خسرت 80 لان المصنع مش بيتحمل خساره معايا   فبالتالي  راس المال يبتدي يتاخد منه مقدما  ففجاه بعد ثاني يوم لقيت محمد هشام يكلمني يقول لي احنا مش معانا فلوس نعمل اوردرات     قعدنا نقول ازاي ويهديك يرضيك وحاولنا نستلف ونرجع الفلوس دي بعد ما الراوند ما تخلص عشان نحقق التارجت آللي احنا عايزين نوصله   اللي هو مره واحده بقينا السهم طالع لفوق وما معناش فلوس نخليه يكمل طلوع   وقلت لمحمد طب نوقف الاعلان ولا نكمل ولا نعمل ايه كده كده احنا كنا متفقين كل اعلان هنعمله هو هيبقى مدته اسبوع لاننا مش هنقدر  نصرف في اكتر من كده في البدايه     وكل حاجه في الراوند دي كانت مانيوال يعني بتدخل اوردرات مانيوال بنبعت رسائل العملاء مانيوال بنتابع مع العملاء لما المنتج يوصل لهم       المهم في الراوند دي عملنا 60 اوردر   واللاب توب بتاعي الشاشه بتاعته باظ   وكان محمد هشام بيحارب لوحده وانا بتابعه بالتليفون ومش عارف اعمل له حاجه   والحمد لله الراوند دي خلصت موجب  بس تراكمي احنا لسه بالسالب يعني انا عملنا مصاريف اكثر من اللي جت وقلنا خلاص هنكمل راوندات  والبيزنس بتاعنا براس المال الضعيف محتاج يشتغل راوندات   نشغله طول الشهر فهو يا دوبك على قد الاسبوع ونوقف نلم فلوسنا ونرجع نشغل تاني استمرينا على كده كذا مره  وكل مره نزود منتجات جديده في الماوس   الفتره دي كان داخل علينا رمضان 

--------------------------------------------------------------------------------------

رمضان

  جينا في رمضان كنا عايزين نلحق الموسم وجمعنا منتجات في اقسام مختلفه وبعدنا عن قسم الماوس روحنا الاقسام زي اللوح المفارش سجادة آلصلاه  ومنتجات اسلاميه وعملنا اعلان فيديو بيتكلم عن اجواء رمضان ورمضانك جواك    وهنا كان في غلطه حصلت ان انا وقفنا اعلان الماوس باد نهائي وعملنا اعلان ثاني خالص باستهداف ثاني خالص باجواء ثانيه خالص مره واحده فتحس ان الناس اتخضت  فلما عملنا الاعلان   حسينا ان الاستهداف اتشتت في زيارات كثير جدا على الويب سايت بس ما فيش اوردرات ساعتها مش عارفين نعمل ايه قلنا ممكن الاسعار قللنا الاسعار قلنا ممكن الشحن خلينا الشحن مجانا   مع ان ده هيخسرنا بس قلنا مش مشكله بعدها حسيت ان المشكله في الاعلان فعملت اعلان جديد وحطيته معاه برده ما جابش اي حاجه   برده زيارات كتير بس ما فيش اوردرات وخلص الاعلان على صفر اوردرات بس محمد هشام لاحظ حاجه قال لي ان احنا في اخر الشهر واوردراتنا اللي فاتت كانت دايما بتبقى في اول الشهر وهنا خدنا بالنا ان احنا منتجاتنا مش منتجات اساسيه لكن هي تعتبر منتجات ترفيهيه الناس بتكمل بيها ديكور مش بتعيش بيها   واحنا كنا في موسم شرس ناس عايزه تجيب بقى خزين واكل وحاجات كده واحنا بنقول لهم تعالوا خذوا حاجه ثانويه تعتبر   وده اللي كان سبب فشل الاعلان وقتها عرفنا ان احنا ما ينفعش نوقف الماوس بات ولازم تشتغل وجنبها حاجه ثانيه او ما فيش حاجه جنبها بس ما ينفعش نوقفها نهائي ونشغل حاجه ثانيه استنينا بالضبط يومين كنا بقينا في اول الشهر وشغلنا اعلان   وجاب نفس النتيجه بتاعته الغير متوقعه بس المره دي كنا عاملين حسابنا في الفلوس نستلف وفي النص بدا يجي اوردرات كبيره نسبيا زي مثلا كوافير حريمي خد مني خمس قطع بلوجو المكان بتاعه وعشره   ماوس باد لمكتب محامي وحاجات زي كده فبدا سهم المنتجات المخصصه يطلع اكتر وبقى هو الاكثر مبيعا عندنا واحنا كنا في الناحيه الثانيه كل شهر نزود منتجات قبل ما نبدا الراوند 

--------------------------------------------------------------------------------------------------------------

  بعدها جت موجه ده لها اسعار غير متوقعه الاسعار زادت بس المورد ما زودش الاسعار على الموقع عنده فبالتالي انا بتحاسب على اسعار انا مش شايفها فكلمتهم وتواصلت معاهم قلت لهم محتاجين ان انتم تظبطوا الاسعار عندي فقلت لهم مره واثنين وثلاثه   تظبطوها فعلا بس طلعت بكسور دي طبعا هتدمر لي الحسابات فطلبت منهم يعدلوها اخره جدا فانا فكرت اشغل الاعلان وخلاص بس محمد   كان رافض   قال لي استنى هيعدلوها   قلت له ماشي واستنينا يومين ما عدلوش حاجه فقررنا ان احنا نقرب لاقرب صحيح ونبتدي نشتغل على كده محمد قال لي على مسؤوليتك اللي هيحصل ده ولو هم عدلوا سعر غير السعر ده انت هتعمله لوحدك وانتم بتتكلم في حوالي 200 منتج بتعملهم بالواحده وانا كنت مستعجل عشان مش عايز آلراوند تتاخر    وبعدها شغلنا الاعلان و ووصلت تقريبا للي انا كنت قايل عليه زنك الحمد لله عدلوا الاسعار  ووصلت تقريبا للي قلنا عليه 

------------------------------------------------------------------------------------------------------------

   بعد كده كان في مشاكل المانيوال بتواجهنا ان احنا عددنا قليل احنا اثنين 

  كنا بنعمل حاجات كتير منها اننا واحنا بنرفع منتجات جديده لازم ناخدها تاني نرفعها على الفيسبوك عشان تظهر في الاعلانات وكمان الاوردرات ما كانتش بتتحط في شيت كنا احنا بنحطها يدوي وكمان داتت المنتجات كنا بننقلها من شيت المنتجات لشيط الحسابات بشكل يدوي وكمان كان في مشكله كبيره جدا تقفيله الراوند دي كانت اكثر حاجه مرهقه ان انا كنت ببعت للعملاء واطمن الاوردر وصل كويس وانا بقفل حسابات الراوند بعدي على الاوردرات اوردر اوردر اشوف ايه ظروفه بعد ما ربطناه في الشيت الاوردرات بتنزل على الشيت بشكل تلقائي بس عشان نعدل الاوردر من حالته اللي تم التوصيل او جاري التنفيذ او اي حاجه كنا بنعملها في الشيت وبعد كده نروح نعملها على الويب سايت وده طبعا كان صداع ابن لذينة و دي ربطنا الشيت بالويب سايت ف لما اعدل الحالة ف الشيت تسمع تلقائي ف الويبسايت و بقا التحديث من مكان واكد وكنا لما بنيجي نحسب الحسابات كنا بنمشي على اوردر اوردر نشوف ده بكام وده بكام ونجمع ونطرح وكان الموضوع بيبقى صداع جدا ومرهق جدا جدا جدا ممكن ياخد يوم كامل عشان بس نظبط الحسابات ونعرف احنا الراوند دي كسبانين ولا خسرانين   واحده واحده بدانا نحل المشاكل دي حاجه حاجه اول حاجه لقينا طريقه ربطنا الويب سايت في الفيسبوك في بقت المنتجات باعت لوحدها بالليل الساعه 2:00 بالليل وكاننا عيلنا موظف بيعمل المهمه دي مكاننا بالليل ثاني حاجه بقينا طريقه بتنقل الاوردرات من الويب سايت للشيت بشكل تلقائي اول ما الاوردر ما يجي ودي برده مهمه اتشالت من علينا   طبعا الحاجات اللي بقولها دي مش يوم وليله مش فكره كده دي خدت وقت وتفكير ومجهود وشغل ساعات عشان نقدر نوصل لها المهم تقفيله الراوند انا كنت متاكد ان في طريقه تسهل الموضوع بس ما كنتش عارف هي اي  فكلمت محمد هشام ودخلنا ميتينج طويل جدا بنتناقش في هذه الفكره لحد ما وصلنا لطريقه اننا نخلي في شيت الاوردرات حاجه اسمها هامش الربح وحاجه اسمها تكلفه الاوردر وكل اوردر بيعمله نروح حاطين في الخدين دول اعمل ربح كام والاورده تكلفته علينا كام وما نحسبش اي حسابات طول ما احنا شغالين الراوند  وبعد ما نخلص نروح جامعين العمود بتاع هامش الربح للاوردرات الناجحه وكده احنا عرفنا احنا كسبنا كام بمنتهى البساطه ونجمع العمود بتاع التكلفه ونعرف الاوردرات كلفتنا كام ونجمع تكلفه الاوردرات للمرتجعات ونعرف احنا جالنا مرتجعات بكام ودي خسرتنا كام فبقت موضوع تقفيل   الراوند بياخد على بعضه نص ساعه وبدانا نبني شيت محاسبي في معادلات ان ده برده كان بيتعمل يدوي فيبتدي يحسب لنا كل حاجه بشكل تلقائي مجرد ما ادخل مجموعه ارقام هو يديني النتيجه في الاخر انت كده كسبان ولا خسران ولا انت ظروفك ايه   عملنا تقرير مرئي لحالتنا السهم بتاعنا طالع ولا نازل ولا ايه ظروفه في الشهر ده    ويعيننا موظف ثالث مش موجود يعني موظف وهمي ينقل المنتجات الجديده بالبيانات بتاعتها من شيت المنتجات   شيت الحسابات بشكل تلقائي  الساعه 2:00 بالليل  فده كان بيريح علينا فكره اعاده الشغل وبقى في حد ثاني بيعمله   حولني على قد ما نقدر ان احنا نشتغل بذكاء فكل حاجه نعملها بنلاقيها قلبت روتيني نحاول نلاقي طريقه ان اله تعملها   قلنا لما كان في اوردر جديد بيجي كان لازم ابقى صاحي له وادخل ابعت رساله انا كاتبها ثابته ان احنا استلمنا الاوردر وشغالين عليه ده عميل عميل فطبعا لو في اوردر جاي بالليل وانا نايم وده ما تبعتلوش وانا تاخرت عليه والله اعلم هيقول لي الغي ولا اعمل الاوردر ولا ايه الدنيا فكنا بندور على حاجه   زي   ما الاوردر ما بيتبعد في الشيت تلقائي نبعت رساله للعملاء على الوتساب تلقائي في نفس الوقت الحمد لله بعد بحث لقينا ايزي اوردر موفرين الموضوع ده وعملناه بس كان عندنا مشكله ثانيه ان في ناس ما بتردش على الرساله دي فمش عارفين انت عايز الاوردر ولا انت مش مهتم ولا انت اكدت ولا انت ايه   فكانت نسبه المرتجعات بتبقى عاليه وفي نفس الفتره دي لقينا ايزي اوردر    تعاون مع خدمه بوت متابعه وتاكيد اوردرات بيعمل ايه بيبعت للناس رسائل على الوتساب   و  يتصل بيهم في التليفون مكالمه عاديه اليه  بتقول له اسمه والاوردر بتاعه وبتاكد عليه لو محتاج الاوردر او عايز يلغيه او عايز حد من خدمه العملاء يكلمه ودي قلله المرتجعات بشكل كبير جدا لان العميل بياكد الاوردر قبل ما احنا ننفذه ودي برده سهلت علينا كثير بقى في حاجه موظف معانا بيعمل الموضوع ده وكان في مشكله ثانيه اللي هي الرسائل والكومنتات اللي بتيجي على فيسبوك اثناء ما الاعلان شغال وبرده بعد بحث لقينا اداه مهمتها ان هي ترد على الناس مكاني في الكومنتات او في الرسائل الفكره كلها ان انا بديها حاجه اسمها معرفه بعرفها البراند بتاعي اسمه ايه بعمل ايه ببيع منتجات ايه كل حاجه كل حاجه كل حاجه وهو يبتدي يتكلم مع الناس مكانك كاني انا بالظبط وده قلل علينا برده موضوع ضغط تواصل العملاء فبقينا احنا فعليا اثنين شغالين بس معانا تيم ورانا من الالات بيسهل علينا وما زال التطوير مستمر لسه في حاجات بنعملها بشكل روتيني ممكن تتشال من علينا وده نتيجه اننا بنفكر ازاي نشتغل بذكاء   ونسهل على نفسنا فكره المشروع نوصل لمرحله اننا نركز في التصميمات وفي المنتجات وكل حاجه ثانيه تتعمل بشكل تلقائي     لازم تفكر في الاول احنا اللي بنعمل الصور بشكل كامل وده كان بياخد مننا وقت طويل جدا دلوقتي بقينا بنعمل الصوره الاساسيه بس هي اللي بنعملها بشكل يدوي لان احنا عايزينها نفس الصوره بتروح للعميل هي هي الصوره اللي موجوده على الويب سايت وبنعمل الصور الثانيه بالذكاء الاصطناعي بنحطها في ديكور بنحطها في مكان مناسب ونحاول على قد ما نقدر نقدر نحافظ على تفاصيل المنتج وده برده سهل علينا عمليه رفع المنتجات   وعايز اقول حاجه مهمه ان كل الحاجات دي ما كانتش هتحصل لولا القدر ولولا ان ربنا واقف معانا واحنا شغالين بضمير فكل شويه الافكار اللي هي تسهل علينا دي بتيجي بسبب احنا قعدنا فكرنا فيها عشان نسهلها اول اغلبيه بتيجي بالصدفه اللي حاجه احنا عايزين نعملها  ونلاقي الاداه اهي طلعت لوحدها ظهرت من العدم  بس ده مظهرش من العبث يعني احنا مش مش اللي هو احنا عايزين نعمل كذا فلقينا لقينا كذا بسهوله هو اللي حصل ان احنا عندنا الخطه وعارفين ان ده هيتعمل بس مش عارفين امتى في مره واحده نلاقيه اهو   ده وقتها ونلاقيها بتتعمل لوحدها يعني مثلا موضوع الرسائل على فيسبوك ده انا كان في دماغي بس بقلب على فيسبوك لقيت اعلان   بيقول خد جرب الاداه دي وهي فيها بالظبط اللي انا كنت بدور عليها وقيس على ذلك بقى كل حاجه ثانيه ففعلا في البراند ده اتعلمت ان ربنا مع المجتهد شفتها بعيني وشفت حته الرزق دي ماشيه ازاي بالظبط غير وانا شغال في شركه او انا شغال في حاجه فانا مش شايف الشكل من بره وفعلا بيبقى جاي لنا اوردرات وخصوصا الاوردرات اللي كانت    بتيجي بعد ما نقفل الاعلان هي فعلا بتبقى عشان خلاص قفلنا وقفلنا حساباتنا وقفلنا كل حاجه ونلاقيها دي جايه عشان تظبط لنا الحاجات اللي باظت الفلوس مثلا اللي راحت خساير كل الكلام ده يعني فاكر اوردر جالنا من غير اعلانات وكان ب 2000 اللي هو رقم كبير جدا بالنسبه للمنتجات اللي عندنا او اللي مركزين عليها دلوقتي و هيا كانت الماوس باد اللي هيا كان ب ١٣٣ وجاي لنا من غير اعلانات

و كل راوند كنت انا و شريكي نضخ مبلغ كل شهر اول ما نقبض نحط فلوس لجواك اكننا بنديله مصروف عشان يغطي الاعلانات اللي اتصرفت و الخساير اللي حصلت ف الراوند اللي قبلها ولو كنا كسبانين بنحط برضه عشان نساعد و نسرع النمو 

كل شهر كان نتيجته ف الاخر تبقي بالسالب بعد ما نخصم فلوس الاعلانات و فلوس المرتجعات و نطرحها من اجمالي الربح و مبلغ الربح التراكمي يزيد بس بالسالب لحد ما وصلنا ل ١٢ الف بالسالب يعني عندنا مبيعات مستقرة و فيه هامش ربح بس الفلوس اللي بتيجي بتبقي قد الاعلان اللي اتصرف و بس و بتجيب معاها كمان فلوس خساير لو فيه مرتجعات لحد ما قررنا قرار مهم و فرق ف البزنس اننا هنعمل حاجة اسمها تبرعات بمعني اننا هنحط الفلوس اللي بنحطها عادي بس هنحطها ف خانة تبرعات يعني مبلغ هامشي بصرف منه الاعلانات بس مش بيتسجل ف السجلات ببساطة خليت احنا اللي نتحمل تكلفة الاعلانات مش البراند الموضوع ده فرق جداً و الفلوس بدأت تزيد و الربح بدأ يبقي مستقر بس قدام شوية لازم نحمل الاعلانات علي البراند و لازم نحمل عليه مرتبات زي ما محملين عليه الاشتراكات يعني يشيل نفسه بس حالياً احنا بنحاول نسنده 

--------------------------------------------------------------------------------

و الفترة حالياً قدرنا نوصل لمصنع تاني شوفته زمان من قبل ما أبدا البراند بس المشكلة ان كان الويبسايت بتاعه مش مستقر زي زينك ف لما اشتغلنا بعد قترة و الناس بدأت تطلب ماوس باد الكبيرة اللي هيا جيمنج ماوس باد فعملنا سيرش ولقيتها في الموقع ده فبدانا نتعاون معاهم وعملنا اكونت وظبطنا الدنيا وكده بقى عندنا مصنعين شغالين معاهم و فيه مصنع تالت لسه هنتواصل معاه كمان و التطوير مستمر لاننا محتاجين نكون واقفين علي ارض صلبة من ناحية الموردين و المنفذين

في بقى حاجه حصلت الاوردرات الكبيره اللي كانت بتيجي هو اقصد يعني الاوردرات اللي بالجمله اللي هي بالكميه كان اقصى حاجه جات لنا كان 10 قطع وفي اوردرات جت في النص ناس اصحاب محلات كمبيوتر بيطلبوا ان هم يشتروا بالجمله كميات كبيره وهم يبيعوها بالتجزئه طبعا احنا كان سعرنا غالي عليهم لان احنا بنتعامل بالقطعه فحتى لو ظبطنا الاسعار فبالنسبه له المورد ارخص بس كان عاجبهم التصميمات بتاعتنا وناس كثير جت سالت فعلا حوالي خمسه سالوا على كميات وبجد بيتكلموا في كميات كبيره كاني بقيت انا المورد بتاعهم فالمهم الاوفرات دي طبعا ما كملتش بسبب السعر 

في بقى قصه تانيه عميل غريب جدا هو شركه ده جالي ابعث لي اللوجو قال لي انا عايز اعمل ميكس منتجات من عندك عايز  ماوس باد وشنطه واستيكرات وستيكر شيت وجراب موبايل وابعت لي لوجو الشركه بتاعته كانت شركه شحن بضائع بره استيراد وتصدير فالمهم انا يعتبر عملت له هويه كامله اخذت اللوجو وظبطته على المنتجات دي وعملت له برزنتيشن وبعتها له والراجل ده ما كانش فارق معاه الفلوس على قلب ما فارق معاك كواليتي بس والحمد لله تم بنجاح

في بقى عميل اغرب ده برده شركه بس ده شركه معدات هندسيه دي برده قال لي انا معايا اللوجو عايزك تعمل لي ماوس بس انا عايزك تعمل لي كميه كان بيتكلم في 150 ل 200 منتج فقلت له ماشي ما فيش مشكله فقال لي عنده ايفنت خلال اسبوع ومحتاج الحاجات دي في اقل من اسبوع وانا طبعا ما كنتش الحق اعمل ده فقلت له ان انا مش هعرف وكده عشان الوقت ضيق وكده وقال لي تمام وخلاص اختفى بس انا كنت قلت له الاسعار وطبعا عملت له خصم على الكميه و شحن مجاني المهم اختفى وجالي بعد فتره طويله بيقول لي انا عايز اعمل 150 ماوس باد بس عايزك تعمل لي تصميم وتوريه لي الاول وتبعث لي عينه عشان نقيمها ونشوف لو هنعمل الكميه الكبيره ولا لا فقلت له تمام ما فيش مشكله عملت له التصميمات واختار منها واختفى بعد فتره ظهر وقال لي التصميم اللي اختاره وابعت لي عينه فقلت له تمام ما فيش مشكله فبعثت له العينه وكلمت المصنع استعجلتوا انه يديها اولويه وبس وبعثت له بالفعل شافها ورد عليا هو عايز يغير اسلوب الطباعه نفسه يعني عايز يطبع على الرابر مش الفابرك العادي فقلت له ان ده مش هينفع قال لي لا ده راي الناس وانا مش هينفع ادي هدايا بالمنظر ده والقماشه بتاعتك بتتقطع والكواليتي مش احسن حاجه وبهدل لي خالص الدنيا وقال لي معلش انا بركز في التفاصيل قوي في السكينه قطعها غلط والمنتج لو شديته من الجنب بيتقشر فقلت له ما فيش حد بيشد ماوس باد من الجنب بس فكان رايه مش مقنع بالنسبه لي بصراحه فقلت له تمام وحاسبني على عينه وخلاص بس اه في حاجه نسيت اقولها لما طلب مني ال 200 ماوس باد وبعد كده اختفى لما رجع لي بقى ثاني لقيته بعث لي تصميمات حد ثاني عاملها له ولحد ده كان حد من المنافسين فتمام فلما سلمته العينه ابعث لي فويس نوت لحد بيدي له رايه احنا عن المنتج فبيقول ان الطباعه دي احسن من الشركه الثانيه بس هي نفس الفينش فهم كانوا عايزين يغيروا في الفينش وده طبعا ما كانش ينفع بس فدي من الحاجات البسطتني يعني ان انا بتعامل مع مصنع كويس محترم وكواليتي
مهمه جدا


و ايزي اوردر طلبت منهم حاجة يضيفوها لانها هتفرق معايا جدا و هيا التعديل الجمالي للمنتجات تحديدا الاسعار يعني مثلا زود 100 جنيه علي كل المنتجات دي اللي انا محددها او زود 10% لدول  او قيمة ثابتة علطول متأخروش عليا لقيتهم عملوا ال bulk edit انا حسيت اني كنت مفتقدها لاني كنت بستخدمها ف اماكن تانية و كمان بحكم شغلي ف الدزاين اشتغلت ف مجال ال ui/ux ف اخدت خبرة و عرفت انا محتاج ميزة اي هنا و اعملها ازاي و ده طبعا ساعدني جداً

دلوقتي ظهرت مشكله جديده ان لما اوردر بيرجع مرتجع للمصنع المصنع بيدخله يدوي للمخزن عندي فيظهر لي على الويب سايت فلما اوردر بيرجع لي انا ما بعرفش اعمل له اعاده طلب غير لما يظهر في المخزن في المصنع اوقات بينسى يعمل الكلام ده فلازم انا اللي ابلغه فانا عايز اعمل سيستم او حاجه تساعدني على مراجعه المخزون بسهوله اربط بقى الاوردر ف عملت حاجة ف الشيت بتاع الاوردارات تخلي لما اغير حالة الاوردر ل مرتجع المنتجات بتاعت الاوردر ده تتبعت تلفائي ف صفحة ف الشيت اسمها انفنتوري اقدر اتابع منها بسهولة المخزون اللي عندي و اقارنه باللي ف الموقع و اقدر احدد حالتهم

وكمان كان في حاجه ثانيه وانا بقفل الراوند والحسابات بعمل حسبه كده بسيطه بشوف القطعه اللي اتباعت بحيث اعرف انهي منتج اتباع اكثر في الراوند دي وانهي منتج عامه من ساعه ما بدانا هو الاكثر مبيعا فالموضوع ده كنت بعمله يدوي ان انا اعدي على اوردر اوردر اشوف المنتجات اللي اتطلبت فيه واروح على مكان كده عامله في الشيت بتاع التقفيل الراوند اعمل بحث بال sku  وابتدي اضيف الرقم لغايه اما اخلص خالص واجمعهم واشوف ايه اللي طلع فبرده دي عايز اعملها اوتوماتيك بحيث برده تسهل عليا الموضوع بتاع تقفيل الراوند ف عملت كده بالفعل و خليت الموضوع بقا عبارة عن زرار بدوسة اول ما اخلص الراوند و الشيت لوحده هياخد الاوردارات اللي حالتها بقت تم التحصيل و يشوف ال sku اللي معمول و يشوف قصاده كام قطعة و يروح ياخدهم ينقلهم ف شيت الحسابات اللي بقفل فيه الراوند و شال من عليا وجع دماغ ده انا بس براجع و بفكر اعمل كده كمان ف الحسابات بس خايف الكمبيوتر يغلط فيها ف بفضل اعلمها انا احسن و خصوصا بعد تطويرها ف الموضوع بقا سهل و مبقاش معقد زي الاول

------------------------------------------------------

في الفترة الأخيرة كنت ماشي بين طريقين في نفس الوقت.

الطريق الأول كان "جواك". البراند اللي بقالي فترة ببنيه خطوة بخطوة، وبحاول أخليه يقف على رجليه بشكل حقيقي. كنت بدأت أفكر أجرب كاتيجوري جديدة غير الماوس باد، حاجة بمارجين مختلف، تكلفة إنتاج مختلفة، وسلوك شراء مختلف. بدأت أبص على شنط اللابتوب وأدرسها وأشوف هل ممكن تبقى باب جديد للمبيعات ولا لأ.

لكن وأنا بفكر في ده كله، كان فيه قلق جوايا من نوع خاص.

مش قلق إن المنتج هيبيع ولا لأ.

كان قلق الكاش فلو كنت خايف انه يتكرر تاني و تحصل ازمة سيولة.

ودي من أكتر الحاجات اللي كنت خايف منها.

لأن ساعات الطريق بيبقى ناجح على الورق، لكن يقع بسبب نقص السيولة مش بسبب نقص المبيعات.

وفي نفس الوقت كان فيه طريق تاني بفكر فيه.

فكرة مشروع جديد تمامًا.

مشروع خشب وليزر وديكور.

فكرة براند مستقل حد اقترحه عليا انه يعمل ساعات و حاجات ديكور، و ده طبعا ليه شخصيته وهويته ومنتجاته المختلفة. كنت شايف فيه فرصة حقيقية، لكن كنت عارف برضه إن أي مشروع جديد محتاج رأس مال، ومحتاج مساحة للتجربة، ومحتاج وقت عشان يثبت نفسه.

وكنت محتار.

أركز على جواك؟

ولا أبدأ المشروع الجديد؟

ولا أستنى شوية؟

وفي وسط كل التفكير ده حصل موقف غريب جدًا.

كنت عند عمي، وقعدنا بنتكلم عادي.

فجأة قالي إن فيه مبلغ حوالي 20 ألف جنيه جاله، وإنه كان ناوي يعملهم إيداع أو يحطهم في البنك أو في صندوق استثماري.

في الأول كنت فاكر إنه بيحكيلي وخلاص.

لكن بعد شوية الكلام اتغير.

قالي: "خليهم معاك."

افتكرت إنه بيهزر.

قالي: "اعتبرهم فلوسك."

وقتها استغربت أكتر.

قالي: "اتصرف فيهم براحتك. المهم أول كل شهر تبعتلي الأرباح بتاعتهم."

ببساطة شديدة.

لا طلب مني أرجعله أصل المبلغ كل شوية.

ولا قعد يحط شروط كتير.

ولا دخل في تفاصيل معقدة.

كل اللي كان عايزه إن الفلوس تشتغل وتجيب عائد.

وأنا ساعتها كنت أصلًا بفكر في نفس المشاكل ونفس الاحتياجات.

وسبحان الله.

في الوقت اللي كنت قلقان فيه من نقص السيولة، ظهر احتياطي.

في الوقت اللي كنت بفكر فيه أختبر كاتيجوري جديدة، ظهر تمويل يسمحلي أجرب وأنا مطمن.

في الوقت اللي كنت بفكر فيه في مشروع جديد محتاج رأس مال، ظهر رأس مال و عمى أصلا سمعني بتكلم ف الموضوع ده مع حد و قالي انه عجبه و عايز يدخل معايا فيه.

عشان كده حسيت إن الموضوع مش مجرد مصادفة عادية.

مش بالضرورة إني أعرف الحكمة كاملة أو أفسر كل حاجة.

لكن أكيد ربنا مطلع على اللي إحنا بنمر بيه.

وأكيد ربنا يعلم حجم التفكير والقلق والحسابات اللي كانت شغالة في دماغي.

الفكرة مش إن الـ20 ألف غيروا حياتي.

الفكرة إنهم غيروا إحساسي.

بقوا عامل الأمان اللي كان ناقص.

بقوا الاحتياطي اللي مخليني أعرف أجرب وأنا واقف على أرض ثابتة.

بقوا السبب إني أرفع ميزانية الإعلان وأنا أهدى.

وأدخل كاتيجوري جديدة وأنا مطمن.

وأتعامل مع الموردين وأنا عارف إن فيه غطا لو حصل أي ضغط.

وأجمل حاجة إني ما استخدمتش الفلوس كأنها هدية أو مصروف.

بالعكس.

بدأت أفكر فيها كأصل لازم أحافظ عليه.

وأخاطر بالأرباح اللي هتطلع منه، مش بالأصل نفسه.

فبقيت شايف الصورة كده:

جواك يكبر.

الفلوس تشتغل.

الأرباح تتولد.

وجزء من الأرباح دي يبقى هو الوقود الحقيقي لمشروع الخشب والليزر والديكور اللي هيبقي بتاع عمى بالكامل و يعدها ممكن ندخل جمبه ناس و كاتيجويز تانية و يبقي باب رزق علي جمب لعيلتى حسناته تعود ل جواك.

وكأن كل حاجة بتمهد للي بعدها.

جواك بيمول المرحلة اللي بعدها.

والمرحلة اللي بعدها ممكن تبني مشروع جديد.

والمشروع الجديد ممكن يبقى نواة لفكرة أكبر.

يمكن ماركت بليس صغير.

يمكن منصة فيها أكتر من فئة منتجات.

يمكن شركاء وموردين مختلفين.

يمكن حاجة أكبر من اللي متخيلها النهارده.

محدش عارف.

لكن اللي أعرفه إن ربنا ساعات بيبعت السند في الوقت اللي أنت محتاجه بالظبط.

مش قبلها بسنة.

ومش بعدها بسنة.

في الوقت المناسب.

وأحيانًا السند ده ما بيبقاش رقم كبير.

بيبقى مجرد إحساس إنك مش لوحدك.

وإن فيه مساحة تتنفس فيها.

وتجرب.

وتغلط.

وتتعلم.

وتكمل.

-------------------------------------------------------------------

   وما زال التطوير مستمر والمشوار مستمر وجواك هيفضل جواك وفارس كرم اللي كان و هو صغير حاسس انه هيبقي بيزنس مان و شاف الطريق و هو بيتمهد ليه واحدة واحدة ازاي واحكي لكم كل القصص الجديده وكل الاحداث اللي بتحصل واحده بواحده كده انا لخصت كل اللي فات وهبتدي احكي الجديد